政情：李梓敬踩場 叫蔡耀昌道歉
終審法院早前裁定申領綜援須居港滿七年嘅限制違憲，觸發新一輪中港矛盾大決鬥，其中不滿裁決嘅自由黨青年團主席李梓敬已同社區組織協會（社協）幹事蔡耀昌連續開火多日。李梓敬尋日更加踩上社協位於何文田辦事處抗議，要求蔡耀昌向該黨甚至全香港市民道歉喎。
蔡「法西斯論」惹不滿
原來二人日前喺《城巿論壇》激辯期間，蔡耀昌批評右翼變成「法西斯」、排外主義。向來自稱右翼嘅李梓敬，對被標籤為極權主義相當不滿，又認為裁決好可能觸發新一輪骨牌效應，針對公屋、長者生活津貼嘅司法覆核將陸續有來，對香港福利開支造成沉重負擔，愧對香港人，決定帶同青年團兄弟踩上社協辦事處，要求蔡耀昌道歉。
對於有稀客登門造訪，蔡耀昌好合作咁接收請願信後，反駁李梓敬對號入座，拒絕道歉，仲勸該黨多做實事咁話。不過，無論雙方喺鏡頭前激戰到面紅耳熱，睇怕都係為咗未來選舉拉票啫，但相信隨着有人就公屋申請須住滿七年嘅規定提出司法覆核，呢台戲似乎係一套過百集連續劇。