政情：元老唔撐周振基跌棒
臨近年尾，好多團體或商會領導層都夠鐘執位，好似潮屬社團總會都換屆，按照傳統慣例，主席一職應順理成章由現任潮州商會會長周振基（Stephen）擔任，但今年卻打破傳統，由原本卸任嘅陳幼南（Ian）冧莊做多一屆主席，做法極不尋常。
年前加會費掀起風波
有消息透露，Stephen自擔任潮商會長後，會內發生唔少風波，更惹來會內元老不滿，因而無緣擔任總會主席。不過，Stephen就否認傳聞，仲聲言：「我要坐（主席位），一定坐得到！」
新一屆潮屬社團總會主席位冇交棒畀Stephen，做法引起潮人圈內議論紛紛，揣測會內係咪上演宮廷內鬥，有人估計可能同年前Stephen實施加會費風波有關，事件認真耐人尋味，更令「陳周之爭」頓成熱話。雖然Ian冧莊一年嘅安排極罕見，但支持Ian嘅有唔少元老，包括陳父陳偉南、永遠名譽主席蔡衍濤、許學之等，陳父更係總會創會主席，在會內一向德高望重，喺眾元老力挺下，Ian獲拍板留任。
陳幼南破例連任主席
至於失落總會主席之位嘅Stephen，就當選做名譽會長，因而被指獲頒「安慰獎」。Stephen話，冇為此唔開心，亦否認有人不滿佢而「奪去」主席之位。佢話，總會主席係由潮州商會推薦，佢身為會長，絕對可以推薦自己：「我要坐（主席位），一定坐得到！」只係佢有感Ian做得唔錯，唔少新政策需要持續推行，所以選擇「退位讓賢」喎。佢又話，歷屆潮屬社團總會主席只係咁蹺由潮商會長出任，兩者之間係無必然性喎。
Stephen又強調，潮商會內無矛盾，希望外界唔好亂猜測。咁下屆會否捲土重來競逐社團主席？Stephen就話一定唔會：「主席位，邊個做都無所謂，團結先係最重要。」等會長任期到明年八月底完結後，佢仍會以唔同身份繼續為潮人服務。下屆潮商會長由邊個做？聽聞好大機會係副會長張成雄接棒，但當然有待證實啦。