中環出更：周街派套陳恒鑌自己不設防
「平安夜，失身夜」，聖誕佳節一向係男男女女「失身」嘅高峰期，育有一女嘅立法會議員陳恒鑌（Ben）尋日就趁機落旺角行人專用區，向女士大派安全套，呼籲女仔人家都有責任主動採取避孕措施保護自己，以免「搞出人命」後患無窮。不過，阿Ben就自爆明年開始夜夜不設防，皆因計劃追多個，兩個先至夠哂數，所以手上嘅安全套似乎好快用唔着喇！
負責派「套」行動嘅新界青聯智庫，今年獲日本品牌贊助一千個超薄安全套周街派，兼任智庫顧問嘅阿Ben尋日聯同召集人李世榮等人齊齊派套，提醒女士「停一停、戴一戴、放心晒」。雖然唔少傳統女性行經都怕醜耍手唔敢攞，但亦有女士見啱使就伸手攞多兩個返去慢慢用。
照派畀疑似未夠秤少女
不過，唔知眾人係咪趕住收工慶祝聖誕，派咗冇耐開始見人就派，連疑似未夠十六歲嘅初中生都唔放過。假如細路用得着，青聯智庫咪變相鼓吹「衰十一」（與未成年少女發生性行為）？其實新界青聯智庫都做咗個調查，受訪嘅四百多名十二歲以上嘅女性之中，有五成八都話曾經喺聖誕或假日發生過性行為，與其改變唔到現狀，做足安全措施都係穩陣啲嘅。
卓妮