中環出更：工總青委聖誕P 劉展灝囝囝收「子令」
香港工業總會青年委員會日前舉行聖誕派對，工總主席劉展灝（Stanley）及前主席孫啟烈等前輩都抽空去同後生仔女一齊玩。Stanley一見到孫啟烈次子孫榮良（Warren）帶埋囡囡出席，即刻恨到出晒面，致詞時仲趁機吐心聲，盛讚Warren好支持人口政策，仲叫大家要多產。唔使講都知，佢係講畀身兼青委副主席嘅大仔劉燊濤（Gary）及新抱吳奕筠（Daphne）聽喇！
Gary被問到呢個問題，只係識笑唔識答，其實造人大計只能聽天由命，急都冇用。卓妮見Daphne愈來愈Fit，忍唔住讚吓佢，點知佢呻話最近肥咗就真，事關佢跳槽到一間跨國社交網站公司，公司福利勁好，竟然有兩個超市貨架咁大嘅零食部任食唔嬲。Daphne笑笑口話，好多同事都不知不覺肥咗，佢惟有請負責採購嘅同事，幫幫忙入啲蘇打餅喎。
當晚到場嘅仲有青委主席兼德國寶老闆陳國民嘅千金陳嘉賢（Karen）、孫啟烈大仔兼前青委主席孫榮聰（Eric）、玩具王國開達集團前主席丁鶴壽嘅囝囝丁煒章及中華廠商聯合會副會長顏吳餘英囡囡顏明秀等。Karen最近忙住喺工展會展銷，但都抽空去同班兄弟姊妹玩，認真有心。
孫榮聰睇準韓國商機
Eric話，最近青委一班成員啱啱去完韓國訪問，近年勁吹韓風，無論係智能手機、護膚品或文創產業都備受矚目，佢哋就參觀咗當地享譽國際嘅手機廠、汽車廠及護膚品研發公司等。今趟旅程令佢獲益良多，亦睇到唔少商機，好似佢就試用緊一隻韓國護膚品牌產品，覺得好正，依家考慮緊做香港代理。
卓妮