鬍鬚曾做守財奴至叻已是港人的共識，唯一一次派六千大元係因為佢犯了「低級錯誤」，才迫不得已焗住學澳門派一次咁大把，之後唔理社會乜聲音，守財奴本色就係一本通書讀到老。
財政預算案動畫短片主角Johnny，攬住隻肥豬錢罌，講到明要「有備無患」，一味靠嚇，甚麼幾千億財政儲備除咗可以捍衞港元，又憶沙士一役，政府收入唔穩定，全靠食老本解困；未諮詢已閂定水喉，叫佢「還富於民」，退稅派錢，睇怕係和尚笑尼姑——大家都無法（髮）！
鬍鬚曾既然吾道一以貫之，攬住幾千億等危機來時解困，目前民生多艱，也就如火油箱裏放鞭炮——響過算數；如此理財基本法，呢個財爺搵阿茂去做一樣勝任有餘，總之守住幾千億儲備，香港自然有運行！
已故文史掌故大家高伯雨曾介紹六十年代北京人民大會堂一間會議室裏的對聯：「一心記住六億人口；兩眼看清九個指頭。」撰聯時，約是五八、五九年，其時中國人口約六億。「兩眼看清九個指頭」，是說十個指頭有長有短，批評中國當前各項事業，要認清成績是主要的，佔九個指頭，缺點是次要的，至多只佔一個小指頭。
有心水清的便指出，這對聯的上下比是互相矛盾的；比方說，當年大陸糧食缺乏，配給數量不大夠吃，這當然是缺點，頂多只佔一個指頭。人民代表「看清」之後，相應不理。但六億人民最關心的正是這個問題；人民代表既然「一心記住六億人民」，怎能不記住六億人民記住的事情呢？
特區政府口口聲聲「民生無小事」，「應使則使」——港台新大樓超支天文數字點解釋？而派錢直接惠及貧窮人家就多多藉口？「穩中求變」就係「守財鬥儲備多」；庫房水浸，基層渴死，鬍鬚曾理財基本法萬歲！