政情：陳幼南去工展會做龍友

維園工展會搞得如火如荼，唔少街坊爭住去掃貨。不過，潮屬社團總會主席陳幼南（Ian）就有另類活動，我哋日前下午見佢同太太現身工展會時，即使場內水洩不通，但戴住黑超嘅Ian依然興致勃勃，拎住部相機左影右影，十足專業「龍友」。睇真啲，Ian部相機係德國名牌，剩機身都要約五萬元，認真揼本。Ian自稱係攝影發燒友，呢幾年工展會都有到場捕捉人生百態。佢話好懷念小時候行工展會有雪糕食，眨眼數十年，工展會攤位多到大排長龍，雪糕仍有得賣，但每杯價錢已今非昔比喇。