政情：阿基獲邀（目及）靚女 免費宿東莞
行政、立法兩會「九男女」暑假接受航空公司款待，攜妻帶女豪遊法國嘅風波，觸發部分議員要求立法會收緊利益申報制度，同限制議員接受款待，認真手尾長。言猶在耳，議員馮檢基（阿基）雖然冇份去法國「收飛機」，但今個月初亦中咗安慰獎，獲邀免費北上直擊亞洲小姐競選大中華區總決賽。亞姐同議員職務「大纜都扯唔埋」，阿基解釋，今次係以同鄉身份撐場，仲自爆獨自留宿東莞一晚添！
指私人邀請 同鄉身份撐場
立法會秘書處定期更新議員個人利益登記冊，我哋發現阿基最近更新咗資助海外訪問資料，其中一項係應邀出席亞視月初喺東莞舉行嘅《ATV 2013亞洲小姐競選》大中華區總決賽典禮嘉賓，阿基更獲節目嘅冠名贊助商，贊助來回香港、東莞嘅交通同兩日一夜食宿，名副其實係「全包宴」。嘩！做議員做到獲邀免費睇選美騷，認真有艷福！
阿基急忙向我哋解畫，稱全家都係來自東莞，其中佢媽媽同贊助商老闆，更係東莞厚街鎮嘅同鄉。由於贊助商有感難得活動場地選址厚街，係厚街人嘅光榮大事，於是邀請分屬半個厚街人嘅阿基出席節目。
阿基又理直氣壯地承認，活動係私人邀請，今次以同鄉身份接受資助睇騷，同議員職務真係冇關係o架，但佢認為「咁先好」，市民咪唔使擔心佢會收受任何利益，影響議員決定囉。
不過，阿基可能第一次回鄉太興奮，竟然唔多記得當晚節目嘅精彩內容，連一班佳麗來自何方，都要靠估話應該係中國或華南區，查實候選佳麗係來自本港同內地。東莞一向以「尋花問柳」聞名，阿基自爆太太原本都有份獲邀，只係臨時唔得閒冇去到，唔知阿基返到香港會唔會即刻被老婆大人扭耳仔問話呢？
「馮」請必到 馬國頒獎都去
此外，阿基上個月亦應另一機構邀請，飛赴馬來西亞擔任一個頒獎典禮嘅頒獎嘉賓，逗留足足四日三夜先返港，阿基呢位「嘉賓」真係逢請必到喎。