中環出更：黃錦星籲惜食 騎呢推銷政改
聖誕節係普天同慶嘅好日子，唔係吃喝玩樂同購物，就係出外旅遊，以及同家人歡度佳節。不過，卓妮尋日就發現政府喺社交網站上嘅政改諮詢群組上載咗段宣傳短片，內容係環境局局長黃錦星一邊歎咖啡同西餅，一邊叫市民喺呢個普天同慶嘅日子珍惜食物，之後又叫大家就政改諮詢踴躍發言，真係大纜都扯唔埋囉。
黃錦星呢條宣傳片長約四十幾秒，但局長喺頭十一秒都唔出聲，除咗飲啖咖啡外，仲含情脈脈咁望住送上西餅嘅女侍應。其實佢作為環境局局長，呼籲大家去聖誕派對時珍惜食物，都係理所當然，但最奇怪係佢講講吓無啦啦轉話題，叫大家唔好浪費食物之餘，亦唔好浪費機會，要踴躍就政改諮詢提出意見。
老土打頭陣 後生仔唔受
聽聞黃錦星只係眾局長嘅第一炮，其他決策局官員都要輪流「下海」拍片宣傳政改。政府善用網上平台推銷政改確係好，但如果好似黃錦星拍得咁老土兼夾騎呢，年輕人又點會受落呢？
卓妮