中環出更：郭炳江 鄭慕智 做大廚製造笑料
聖誕節將至，馬灣主題公園挪亞方舟尋日就搞咗個「五餅二魚愛心大行動」，邀請一班弱勢社群及基層人士出席。新鴻基地產主席兼董事總經理郭炳江、馬灣公園諮詢委員會主席鄭慕智（Moses）同委員李家祥（Eric）更化身大廚煮愛心親子飯畀小朋友食。雖然幾位大廚都自稱有煮開嘢食，但就表現得雞手鴨腳，笑料百出，好彩最後班小朋友都食到舔舔脷。
炮製親子飯 險變蛋炒飯
郭炳江、Moses同Eric着住圍裙、戴埋廚師帽上陣，唔止裝備齊全，就連煮食用嘅材料都準備充足，即係所有食材同醬料都調好晒分量，就連親子飯嘅主角雞肉同飯都係預先煮熟，大家只要將雞蛋同其他食材撈埋就得。喺廚藝導師指導下，三位都表現得有板有眼，但Moses落雞蛋時就係咁攪拌，導師見到即刻婉轉咁提醒佢唔使咁落力。而郭炳江就差啲將啲飯倒落鑊同啲雞肉、雞蛋撈埋一齊炒，好彩有導師喝住，否則親子飯就變成蛋炒飯喇。
卓妮問三位事業型男士平時有冇落廚，Eric就話同太太已經係「無飯家庭」好耐。Moses就話自己平時好鍾意煮嘢食，去旅行都會買當地嘅烹飪書籍同特色廚具，朋友都好鍾意食佢煮嘅鮑魚。郭炳江就話，自己最拿手嘅係煮公仔麵，成日消夜都會撈埋啲菜一齊煮，好好味咁話。
郭炳江尋日又同幾個基層同殘障年輕人傾偈，佢聽完幾個年輕人逆境自強嘅故事後，聲言返屋企一定要講番畀自己嘅小朋友聽，等佢哋都學習吓人哋嘅奮鬥精神喎。
卓妮