最新公布嘅香港電台將軍澳新大樓造價，由最初估計約十五億元，暴升三倍至六十幾億元。不過，真正提供廣播服務及辦公嘅淨作業樓面面積，就只佔建築樓面面積三成三，難怪被立法會議員狠批呢棟新大樓華而不實，係大白象工程，又鬧港台大花筒，洗腳唔抹腳喇！依家市面上私樓無論點發水，實用面積點都有七成，點解港台新大樓辦公實用面積比率細得咁離譜呢？但廣播處處長鄧忍光始終未有清楚交代呢個問題。如果將來港台員工要喺好似喺劏房嘅錄音或錄影室內做節目，咁就真係邁向數碼廣播新紀元喇！
