政情：李少光柯清輝 各有教仔風格
近期電視有個親子真人騷節目，搵咗幾位藝人同佢哋仔女面對困難，點知一播出街，李霖恩嘅四歲大女李清宜（Gianna）就畀網民批評有「公主病」。身為爺爺嘅保安局前局長、港區全國人大代表李少光，尋日出席活動時坦言「唔開心就一定有」，又大力為佢孫女解畫，唔覺孫女有問題喎，睇嚟可以氹番孫女喇。
咁李少光當年又係點樣教仔呢？佢話可能自己紀律部隊出身，對子女好嚴厲，做錯事就會體罰。嘩，雖然當年未必被人話虐兒，但係會唔會嚴厲得滯o架？李少光澄清，其實只係施加適當體罰，但太太就緊係唔捨得啦，勒令唔畀李少光教仔，自己教番咁話。依家仔大仔世界，佢都好尊重阿仔，無教路點教孫女。或者孫女好慶幸爺爺無教路，唔係皮肉之苦就少不免喇。
同場嘅思捷環球主席柯清輝聽到李少光咁講，就笑咗三聲，話自己教仔好舒服，唔通佢有秘技？原來一切源於「無為而治」，佢將教仔職責畀晒太太做，有太太做醜人，自己咪可以做好人囉。