政情：鄧國斌出山 貪曾快落鑊？

臨近年底，政府按慣例會陸續出稿公布委員會最新委任名單，包括四個廉署諮詢委員會，大部分現任委員都獲續任。但最備受關注嘅委任，首選就係鄧國斌加入審查貪污舉報諮詢委員會，事關呢個委員會有份負責監察廉署調查工作，亦會就歷時超過一年或需要大量資源調查個案進展作審查等。如果委員會發現廉署查案有歎慢板，或是調查有不合理嘅地方，就會要求廉署解釋，以確保貪污投訴能夠有效迅速處理。

講到呢度，相信心水清嘅市民都會估到政府此舉或有深層意義，因為鄧國斌將有機會（目及）實廉署處理貪曾案，質疑點解會拖延近兩年都未公開交代，加上鄧國斌曾負責審計貪曾豪花公帑外訪嘅醜聞，並對外發表詳盡報告，相信佢最有權威跟進，免得廉署拖吓又一個月，貪曾也心存僥倖以為可以側側膊唔多覺。

或順手清除貪湯遺害

此外，鄧國斌殺入廉署委員會嘅另一目標，可能係被視為貪曾愛將嘅「貪湯」前廉政專員湯顯明有關，因為貪湯濫用公帑送禮同宴請內地官員，將廉署肅貪倡廉嘅形象一手摧毀，出名鐵腕辦事嘅鄧國斌倘時間許可，或可能會過兩招清除埋貪湯喺廉署遺毒遺害，幫廉署省番靚個招牌。

值得一提嘅係，政府同時委任三名立法會議員林健鋒、梁美芬同麥美娟加入廉署事宜投訴委員會，連同政府同日公布建築、測量及都市規劃界議員謝偉銓，獲垂青加入公務員薪俸及服務條件常務委員會，接連有多名議員獲委任新公職，莫非政府有意向各黨派釋出善意，加強伙伴合作關係？