中環出更：愛心獎 胡慧中Fit爆撐場
由港澳台灣慈善基金會主辦嘅第八屆愛心獎，日前喺洲際酒店舉行頒獎禮暨基金會董事會就職禮，包括慈善家田家炳在內嘅五位台港善心人士，成為今屆愛心獎得主。當晚到場嘉賓眾多，但現場就出現一位稀客，就係當年靚絕港台影壇嘅前民政事務局局長何志平太太胡慧中，佢一現身就令人眼前一亮，事關佢極速修身，成個人靚晒，好多影迷都爭相同佢合照。
當晚胡慧中原來係專程去支持基金會新主席何玉美（Emma），佢讚Emma多年來出錢出力，仲話行善唔應該只係做捐款機器，而係要付出真心，確保善款用於刀口上。卓妮同場又見到擔任愛心獎終審委員會主席嘅基本法委員會副主任梁愛詩、專程來港嘅台港經濟文化合作策進會董事長劉德勳等人。
香港台灣善心人獲嘉許
今屆香港得主仲有辭去百萬年薪，免費為貧困青少年補習嘅前中學校長陳葒，台灣得主就包括亞都麗緻飯店董事長嚴長壽、關懷長者嘅天使林依瑩及輪椅鬥士鄭淑勻。卸任嘅基金會前主席錢立祐喺台上介紹得獎者時，頻頻熱淚盈眶；而基金會創會主席林添茂見個會漸受肯定，感到好欣慰，誓言後年進軍內地，齊齊表揚中港台善心人士。
仁愛堂副主席羅台秦都話，愛心獎令佢深受啟發，其實做善事唔係捐錢咁簡單，仲要用心去觀察及關心受助人。今次得獎者背後都有一段感人故事，基金會用有限嘅資源去發掘好人，散發無限嘅正能量，難怪佢都加入做副主席。
卓妮