政情：梁智仁歎湯丸 想請病「文」食
本港天氣呢幾日凍冰冰，醫院管理局（醫管局）新任主席梁智仁同行政總裁梁栢賢（PY）就趁尋日開大會前，專登搵人去九龍城買芝麻湯丸請大家食，可以暖吓身驅寒。
暫拒急症室加價
梁智仁食得好滋味，大讚湯丸夠煙靭，仲向病咗幾日嘅師弟、食物及衞生局局長高永文發出溫馨提示︰「天氣凍好易病，薑汁煮湯丸可以驅寒，早知叫埋高永文嚟食湯丸。」可能主席有所不知，其實高永文呢種叫「辛苦病」。
梁智仁尋日首次以主席身份主持醫管局大會，見佢無怯場，講起公立醫院未來大計似模似樣，話加急症室收費既要考慮政府財政情況，又要顧及政治環境，依家都唔係適合時機提高收費喎。
梁仲話，好支持政府推自願性醫療保險計劃，又有興趣研究港人買醫保嘅情況。不過，梁智仁始終離開公營醫療體系一段時間，當講到公立醫院嘅服務時，佢話都係交番畀PY解釋好啲。