政情：三軌提名 白鴿方便轉軚

有廣泛民主程度就撐

白鴿黨月初提出「三軌方案」，建議候選人只要獲得公民提名、政黨提名或提名委員會三者其中一個組別提名，即可入閘成為候選人。不過，該黨主席劉慧卿喺上周日嘅黨會員大會後會見傳媒時，就唔肯講明「三軌」缺一不可，淨係話只要最終方案有廣泛民主程度，該黨就會支持，又話該黨並唔係鐵板一塊，似乎暗示會「褪軚」放棄公民提名同政黨提名。

防激進狙擊 博「還價」

該黨日前嘅中委會上，班黨大佬更加講到明深信公民提名並不可行，堅持爭取公民提名只係防止被社民連、人民力量同學民思潮等激進團體狙擊。至於政黨提名亦唔係「必不可少」，只係乘機叫高價博北京「還價」，覺得如果一開始就只提出接受提名委員會方案，或者對擴大提名委員會組成嘅方案讚不絕口，北京一定會喺呢個基礎上同佢哋傾，最後蝕底嘅一定係泛民主派。

不過，為表明該黨唔係咁容易退讓，佢哋正積極籌辦一連串活動，包括「每月一星」政改座談會，邀請梁愛詩、譚惠珠等《基本法》權威向該黨黨員講解政改，又會喺農曆年後舉辦兩日一夜非暴力抗爭訓練營，仲下令所有黨員都要參加，學定兩招以應付稍後嘅佔中行動。

雖然白鴿黨表面上提「三軌方案」，與此同時又積極準備佔中，但觀乎佢哋不斷釋出善意，表現出嘅態度並唔係「無得傾」，講到底都係睇一切對該黨有冇利嘅啫。再者，正如我哋之前所講，白鴿黨係咪支持政改，估計都要睇吓有冇其他溫和泛民議員肯轉軚撐政改，多啲「同路人」冇咁肉酸嘛。