食物及衞生局局長高永文一星期做足七日，就算大時大節都唔肯休息，搞到連佢轄下嘅員工都唔敢偷懶。昔日前勞工及福利局政治助理莫宜端以要照顧一對年幼子女為由中途「跳船」辭職，同樣育有一仔一女嘅政助陳凱欣（Rebecca）就話，雖然自己暫時無意離開政府，但自爆成日會攞一對仔女嚟「威脅」高永文，叫高唔好畀太多嘢佢做，費時因為太大壓力而萌生去意喎。
副局長同政助經常要陪住局長周圍去，Rebecca四歲嘅囝囝成日都會問爸爸媽媽去咗邊，當囝囝知道Rebecca又係同高永文一齊出席活動時，就會喺Rebecca返屋企時同佢撒嬌，叫媽咪唔好成日同高醫生一齊。有時為咗安撫成日投訴嘅囝囝，Rebecca就會話因為要留喺辦公室幫病咗嘅高醫生處理文件，等高唔好咁辛苦，可以早啲返屋企休息。不過，咁講就搞到囝囝早前竟然問高永文：「你係咪成日都病o架？」搞到高永文同Rebecca笑到唔知點答。