政情：「施」展墨寶 三代同堂撐場
政界人物通常都周身刀，好似福建幫頭領施子清係當代書法家，政界中無人不知。日前中國書協香港分會成立一周年，喺中央圖書館搞咗個書法展覽，施子清身為分會主席，又點可以唔出動珍藏墨寶公諸同好呢？開幕禮當日，施子清心情非常靚，原來施家三代同堂都有出席捧場，唔怪得之施老先生咁開心啦。
呢個展覽絕對唔係講笑，一共收集五十幾位書法名家珍藏，共一百六十幾幅展品，當中包括國學大師饒宗頤，而施子清就提供最少四幅書法展品，其中一幅題為「好花難種」更係佢嘅心頭好、歷年最滿意之作。施子清話晒係展覽主人家，所以施家總動員捧場，四位公子、施老太同乖孫亦現身支持，三代同堂非常溫馨。
張曉明作品被撞到歪晒
其實同場仲有唔少名人墨寶，例如中聯辦主任張曉明、前新華社香港分社副社長張浚生等。不過，唔少市民日前到場欣賞時，有人就撞到張曉明幅墨寶東歪西倒，如果佢本人在場，一定非常心痛。