中環出更：「踩過界」做主持 高佬賢對辦
漁農界立法會議員何俊賢（高佬賢）學人踩過界做主持？高佬賢近期喺YouTube開設頻道「漁農有你」介紹港產食材，早幾日就上載第一集六分半鐘短片，踩入元朗有機農莊，示範落田收割水稻。不過，睇唔出高佬賢初次做主持已經有板有眼，仲識得間中搞爛gag，表現好過唔少高官、議員，可以考慮多啲拍片宣傳喎！
製網上節目推銷漁農業
高佬賢首先解釋做主持絕對冇「踩過界」，話有感港人對漁農界認識唔深，想借自製網上飲食節目軟銷本地漁農業發展，講到明要「『捐窿捐罅』衝擊你嘅五官六感」添！高佬賢仲學人賣關子，預告會趁農曆新年檔期，介紹花膠、冬菇等賀年食品，會唔會倣效電視台飲食節目咁長做長有？佢話工作忙，一個月拍一、兩集都仲可以，仲寸爆話漁農界支持原汁原味，拍飲食節目唔使落雞汁嘅！
高佬賢仲自爆，細個曾經亮相兒童節目《閃電傳真機》，參加鬥快計數救囚犯遊戲，仲贏咗十幾盒樂高積木返屋企o架。唔通細個嗰次出鏡經驗，加上議會日子有功，高佬賢初次做主持已經講得兩嘴？
卓妮