中環出更：樂善堂成員懲教所歎茶
九龍樂善堂早前舉行「香江話當年」一百三十三周年慈善晚宴，為「樂善關懷基金」籌款，以便向有緊急需要人士提供經濟支援。當晚數百賓客去捧場，主席韓世灝（Johnny）同太太Selina一見到懲教署署長單日堅夫婦就特別好傾，原來早前單日堅邀請樂善堂一班董事局成員去歌連臣角懲教所歎下午茶，嗰度有專為在囚青少年而設嘅茶餐廳培訓中心。
Johnny笑笑口話，在囚人士嘅廚藝認真唔錯，尤其係奶茶，如果佢將來開茶餐廳，一定會請番呢班後生仔喎。單日堅就話，呢間茶餐廳成立未夠兩年，已經培訓好多在囚人士，方便佢哋重返社會後可以即刻投入工作，唔少大型連鎖飲食集團都肯聘用佢哋，成效唔錯。
單日堅又話，十幾年前樂善堂係第一個支持在囚及更生人士嘅慈善機構，為咗令城中善團進一步了解懲教署工作，所以間中會邀請社會人士去歎茶。
曾經係樂善堂百幾年來首位女主席嘅吸煙與健康委員會主席劉文文（Lisa）都有到場，最近傳聞佢再出招，打算建議政府勁加一倍煙稅，Lisa承認確有此事，透露即將去信特首梁振英及財政司司長曾俊華，希望下一份財政預算案採納佢哋意見，令到吸煙人口比例由現時嘅百分之十點七降到單位數字。
「暗瘡剋星」幫手反吸煙
講到本港女煙民數字不跌反升，Lisa都話好頭痛，話要搵常務總理兼「暗瘡剋星」楊小玲（Jackeline）幫手。Jackeline即刻拍心口應承，仲話吸煙會令暗瘡加劇，而且容易面黃、難去印，貪靚嘅城中姊妹最好就戒煙嘞。
卓妮