疑二手當新機賣 電盈洩私隱
購自電訊商的全新手機竟內藏大量私人相片！有巿民於電訊盈科門市購買智能電話，使用時竟發現內藏有數百張陌生人照片，包括護照及身份證等個人資料，懷疑手機屬「二手貨」，惟電盈卻堅持所出售乃全新電話，並以相片由應用程式建立圖作開脫。不過，學者認為相片由應用程式建立的機會甚微，呼籲巿民轉售電話前應徹底刪除智能電話內的個人資料。
朱先生在位於天水圍的電盈門市連通話合約購買一部智能電話，使用約一個月後，竟發現電話內其中一個文件夾存放數百張別人的家庭生活照，懷疑手電屬二手手機，「諗住佢咁大間公司信得過，見部機冇花冇嘢咪冇深入去睇囉，點估到大公司會咁賣電話！」
辯稱應用程式建立相片
朱曾攜手機到門市與職員理論，但對方堅稱出售的是全新電話，更指相片由電話內其中一個相片處理應用程式建立，拒絕更換。
「佢哋話唔會賣其他人用過嘅電話，冇人用過又點會有咁多相喺度？」朱向記者展示電話內約四百張相片，大部分均為同一個家庭的生活照及工作照，更有多張特區護照資料甚至身份證的相片。記者亦發現多張相片在天水圍拍攝，正正是朱先生居住的地區。
面對疑團未解，電訊盈科發言人仍未能作出合理解釋，只稱接獲本報轉介後已即時聯絡朱先生跟進，並已更換一部全新的同型號手提電話。對於是否出售二手智能電話一事，發言人則未有回應。
「佢哋係換咗部電話畀我，但仍然唔肯認部電話之前有人用過，仲話今次係特別處理先同我換。」朱坦言不滿電盈拒絕承認責任，並將責任推予消費者。
專家籲轉售前刪除資料
香港專業教育學院（屯門）資訊及通訊科技系系主任梁秉雄表示，相片由電話應用程式建立的機會甚微，「應用程式最多都只係建立一啲範例相，唔會內置幾百張其他生活相喺度，但咁大間公司又唔會賣二手嘢，可能係有人搞錯，拎咗部用過嘅機出嚟賣。」梁又呼籲市民，為保障個人私隱，一旦轉售電話，便應先將個人資料徹底刪除，「就算將部電話回復原廠設定，都有機會刪除唔到使用者自己加入去嘅檔案，應該要去番放檔案嘅內置空間或者目錄刪除，咁就可以確保資料徹底刪除。」
消費者委員會發言人表示暫無相關投訴統計，但呼籲消費者購買智能電話時，應仔細檢查電話功能及內容，若發現問題應即場向職員反映，以便即時處理及減少爭拗。
記者：楊育輝