政情:CY落區 路姆西放飛機

被「一擲成名」嘅宜家家居野狼公仔路姆西(Lufsig),尋晚正式改名叫「路福西」,路姆西從此成為絕響,是福是禍仲未知。有學者就趁特首梁振英(CY)尋日落區,喺網上發起路姆西飛行大賽,實行「讓路姆西飛」,但飛就飛喇,不過係「放飛機」啫,最後連影都唔見一隻。有藝術工作者就試圖偷運假陽具,頂替臨時缺席嘅路姆西,可惜難逃保安阿姐法眼,假陽具當場被沒收,無法入場。

示威者與保安鬥智鬥力

港深城市\建築雙城雙年展(香港)尋日喺觀塘海濱嘅起動九龍東辦事處舉行開幕禮,經歷財爺鬍鬚曾中蛋一役,場內、場外保安都明顯升級,「可拋擲」物件一律被禁帶入場,好似社運常客陳可樂陪同參展人入會場嗰陣,不但被保安攔截,入到會場範圍更被「挑選」為安檢目標,保安阿姐打開佢個袋一睇就發現膠製假陽具,當場嚇一跳,尷尷尬尬咁要求沒收毫無殺傷力嘅情趣玩具,鬼咁怕醜。

假陽具突圍失敗,陳可樂就聯同幾個藝術工作者,喺會場內趁CY致詞時,高叫口號同舉起示威紙牌,迅速被早已包圍佢哋嘅便衣警員即時制服驅逐出場。場外示威者都有「過牆梯」,除咗例牌嘅打鼓叫囂,有示威者騎電單車上觀塘繞道,懸掛兩條寫有「國際街坊警告:慎防文創推土機」的大型示威標語後速逃。示威者招數愈出愈新奇,類似電影《捉智雙雄》嘅戲碼相信陸續有嚟。

路姆西正式改名路福西

路姆西失蹤觀塘,原來去咗特首辦,CY尋晚忽然幽默,更新題為「與狼共桌」嘅網誌,上載同路姆西嘅合照,話欣賞港人創意無限,趁機買隻送畀囡囡做聖誕禮物,但CY有兩位千金,一隻似乎唔夠分囉!社民連副主席吳文遠就最醒,購入二十隻英國版路姆西,改咗名叫「限量西洋華麗路姆西」,實行「吊高嚟賣」,價高者得,但其實路姆西己正式改名「路福西」。

第一手消息請下載on.cc東網iPhone/iPad/Android/Windows Phone Apps