中環出更：（先刂）雞爆當年「老點」馮煒光
候任政府新聞統籌專員馮煒光，由於已經辭去南區區議員一職，令港島海怡西選區出現空缺，佢嘅前黨友單仲偕（（先刂）雞）現正積極備戰。（先刂）雞憶述，原來馮煒光○三年小試牛刀參選區議會時，就揀海怡呢個選區，當年佢仲建議馮煒光要贏就要先買咗海怡半島一個單位先至得。
叫參選海怡前先買樓
其實買樓唔係咩問題，馮煒光當年亦好聽話買咗海怡半島一個單位，但點知最後選舉輸咗，沙士亦隨之來臨，樓市跌到谷底，令佢雙重損失。當時馮煒光禍不單行，其公關公司亦遇上財困，搞到佢差啲周轉不靈。好彩之後經濟轉好，當年買嘅單位現時已升至最少六百多萬元，而馮煒光間公司又接唔少大單生意，最近佢本人甚至加入埋政府做官，認真世事難料。
不過，依家雞空降到海怡參選，唔知佢又會唔會買番個單位呢？點知佢即刻耍手又擰頭，難怪佢感覺當年好似老點咗馮煒光咁。馮煒光就話，當年嘅事年代久遠，已經唔係太記得，但多年來都當（先刂）雞係兄弟，從來唔覺得有老點佢喎，升咗呢講嘢果然唔同啲。
卓妮