中環出更：高官議員搞出大頭佛
每年一度嘅香港龍獅節又快到喇，今年會以大頭佛為主題，元旦當日預料有一千個大頭佛、三百多隻獅子及數條巨龍一齊喺尖沙咀廣東道巡遊及舞動，可望創健力士世界記錄。今年嘅龍獅節活動，大會仲派出幾千個白色迷你大頭佛，畀名人及公眾參加上色比賽，卓妮就見到環境局局長黃錦星、立法會議員林健鋒（Jeffrey）、陳恒鑌（Ben）、陳鑑林、旅遊界姚思榮等人嘅作品，今次仲唔係政府同政界齊齊搞個大頭佛？
今次大頭佛上色比賽嘅作品，擺喺荃灣荃新天地藝廊展出，名人組方面，最有創意莫過於姚思榮嘅作品，因為佢竟然將個大頭佛油到變咗做獅頭，非常搶眼。黃錦星就將大頭佛油到變咗隻「大嘥鬼」個樣，真係無時無刻都宣傳「惜食」文化。阿Ben就整到個大頭佛勁punk，條眉唔單止係一剔，仲貼滿珠片。而畫功最靚嗰個就係Jeffrey，因為佢嘅大頭佛兩面泛紅，而仲上埋光油立立令。不過，議員工作咁忙，啲作品係咪出自佢哋手筆就好難講喇。
參加龍獅節上色賽
做玩具生意嘅Jeffrey坦言，佢只係負責大頭佛嘅設計，之後交畀同事上色，但自己都有親手去做後期加工o架，即係見到有唔夠靚嘅地方，執番好佢喎。阿Ben都話，佢只係為大頭佛設計概念，希望喺傳統嘅大頭佛上搞啲新意，但佢喺過程中都油咗兩筆嘅。至於同樣有份參加比賽嘅陳鑑林，為咗配合龍獅節及新年，於是為大頭佛戴上平安虎頭帽，旨在為大家帶來歡樂。
卓妮
