政情：八網難逃：樹根「肯 ?!定有問題」

立法會議員鍾樹根一向語出驚人多Sound bite，佢日前出席一電視台時事節目時又有「佳作」，當主持人問到政府係咪有管治問題時，佢突然疑似爆粗講咗句「肯X定有問題」，有關片段隨即被網民瘋傳，仲話要投訴佢咁話。樹根就強烈否認爆粗，聲稱當日節目期間經常受到另一嘉賓「快必」譚得志「搶白」騷擾，所以口快快講咗「肯肯定有問題」，而節目編導事後未有提出節目內容有任何問題，只係網民「生安白造」指控 ，蓄意嫁禍同抹黑。不過，公道啲講番句，樹根疑似爆粗時，快必並無開腔「疊聲」騷擾佢，或者一切只係樹根唔字正腔圓惹嘅禍喇！