政情：路姆西斷市 欲購明年請早
喺地區諮詢會被「一擲成名」嘅狼公仔路姆西（Lufsig），尋日延續搶購熱潮，兩間仲剩餘小量存貨嘅宜家家居分店中，沙田分店有客人晨早七點幾已經霸定位排隊，最少有過百人輪候，結果近三百個籌喺開舖唔夠十分鐘就火速賣晒，銅鑼灣分店大約百二個籌亦喺短時間內賣晒，宜家中午喺社交網站宣布今年所有Lufsig存貨已經售罄，一月初先至會再返貨。
雖然公仔一早賣晒，但下午仍有唔少市民去分店碰運氣，有八個中學同學仔特登遠道由屯門去沙田買公仔，結果撲個空，佢哋話純粹因為公仔名同粗口諧音似而想買。路姆西咁渴市，唔少人就將公仔擺上網炒賣，本地拍賣網站有人標價二百八十元，比香港門市購買嘅折實價八十四元九角貴成兩倍幾。至於內地淘寶網亦有人叫價人民幣一百八十八元，但會唔會炒燶就唔知喇。
學者話發起「飛行大賽」
路姆西熱潮亦引起內地同國際關注，有人更加將路姆西帶到北京天安門前留影，有網民仲話就上海嘅路姆西亦被搶購一空，認真誇張。理工大學助理教授黃國才就喺社交網站發起「全港第一屆路姆西飛行大賽」，呼籲市民趁特首今日到觀塘出席活動時，讓「路姆西」飛行喎。