政情：政改諮詢 工聯會拖字訣

建制「跣到應」 記憶猶新

點解工聯會要諮詢咁耐，副會長黃國健解釋話係工聯會坐擁幾十萬會員，當然要慢慢諮詢啦。但實情係咪咁呢？當然唔係啦，如果大家心水清，都記得上次政改一役，民主黨最初提出「一人兩票」方案時，絕大部分建制派都批評方案違反《基本法》，點知北京竟然讓步，認定該黨一人兩票方案，勞煩一眾建制派要周圍搵落台階「打倒昨日的我」，最後要面懵懵咁支持該黨嘅方案。

經此一役，建制派都吸取教訓，唔敢太早對政改表態，等自己可以多啲迴旋空間，但建制派亦唔可以蹺埋雙手唔做嘢，一味等北京指示，只好成立啲政制改詢小組整色整水，扮晒對外收集意見，實際係用時間換取空間，大打拖字訣暫時唔表態。所以近日唔少建制派提出政改方案，都係用個人身份，唔敢以黨或組織名義提出，就係想博大霧估中終極方案後才扮先知。

五月一日或拉隊上京

至於點解工聯會要五月初先公布，黃國健同理事長吳秋北都無特別解釋。不過，大家可以留意，就係工聯會有可能五月一日拉大隊訪京，屆時好有機會接近權力核心收風，當收到較為準確風聲後，先向特區政府提交意見，咁一定「八九不離十」喇。

記者會上，大家又講到下屆特首選舉，黃國健講笑話，工聯會肯定會推薦特首候選人，但未有打算自己派人落場參選，除非突然發現有好似吳秋北呢類人才喎。講到呢度，吳秋北即刻勁緊張，猛澄清話黃國健只係講笑，叫大家唔使咁認真。其實吳秋北又使乜驚喎，你估真係叫你去選特首咩？