中環出更：施俊輝結婚 冇請恩師葉劉
教育局政治助理施俊輝（Jeff）日前結束鑽石王老五生涯，同拍咗拖一段時間嘅女朋友結婚。不過，Jeff秉持一貫低調作風，只向身邊好友透露結婚一事，仲連擺酒都只邀請舊相識同官場部分同事，連昔日恩師、新民黨立法會議員葉劉淑儀都冇請，唔通佢驚葉太仲嬲緊佢當年靜靜雞加入政府一事？
幸運補上酒店空檔
Jeff日前喺立法會現身，雖然佢繼續怕醜唔肯多講婚事，但一講到老婆大人就甜絲絲，話適逢嫁娶旺季，唔少酒店宴會廳一早被人訂晒，所以打定輸數諗住明年先至結婚。不過，八月底有酒店職員突然通知佢，話十一月三十日晏晝臨時有新人甩底，問佢肯唔肯喺當日擺酒結婚，仲限佢喺一星期內回覆，否則就會改問輪候中嘅其他新人。
Jeff同太太商量幾日後，覺得反正搵到酒店場地，不如提早結婚過二人世界，九月頭仲請咗幾日假去影婚紗相同籌備婚禮。
佢哋婚禮擺咗廿幾圍，請到政制及內地事務局政治助理陳岳鵬做「兄弟」，當然有請作為上司嘅教育局局長吳克儉去飲啦。
卓妮