中環出更：郭少明自揭「繼承」莎莎
中華總商會（中總）尋日舉行企業家論壇，邀請城中企業家分享成功之道。莎莎國際主席郭少明（Simon）旗下品牌，由七十年代嘅四十呎豆丁舖，發展至今業務遍布多地，相信易叫易記嘅品牌名一定功不可沒，係邊位風水師幫佢改個名嘅呢？Simon就喺論壇上自爆，當年採用「莎莎」只係繼承上手舖位個名，皆因當年連一千元轉名費都唔夠畀，所以佢話要多謝當年放舖嗰位老闆喎！
尋日論壇吸引唔少商界精英到場聽書，好似中華總商會會董張俊勇，仲良集團主席、蔣麗芸丈夫梁海明都有櫈仔捧場。除咗Simon分享創業心得及多年來點樣克服經營難關外，黑黑實實嘅稻香集團主席鍾偉平都有現身說「發」，佢由三十幾年前嘅「廚房佬」，慢慢爬上中式酒樓龍頭嘅老闆，佢自嘲行出嚟「老闆款」欠奉，最常畀人當保鏢甚至收數佬，但做生意確係有一手。
鍾偉平原來係「電腦盲」
鍾偉平話，佢勝在肯放手畀下屬作新嘗試，好似稻香係行內第一間酒樓改用電腦落單，又創辦中式飲食管理學校「稻苗學院」，亦係香港少數酒樓自設中央廚房。稻香咁多個「第一」嘅背後，原來作為老闆嘅佢竟然係「電腦盲」，莫講話用電腦，手機都只係識打出打入，但唔肯「放手」又點會得到咁多吖，就連前恒生銀行女大班梁高美懿（Margaret）都係稻香「粉絲」！
同為座上客嘅Margaret先後出任「立法會議員及政治委任制度官員薪津獨立委員會」成員及港交所董事，有冇意思正式加入政府呢？政府冇招手就假嘅，Margaret話政府一直都有向佢傾過唔同嘅發展機會，但要佢坐定定喺辦公室返朝九晚五就要諗清楚先得喇。
卓妮