福宏街違泊 影響學神
「啲車日日由朝到晚泊晒喺度都冇人理，真係好離譜！」元朗工業邨福宏街每日均有不少大型車輛及旅遊巴違例停泊，陳先生指有關位置的交通流量雖然不高，但附近設有駕駛學校，屬考試路線的福宏街常有「學神」出入，擔心違泊影響安全。「咁多死車泊喺度，啲『學神』唔夠經驗又要兩邊切線避車，真係好牙煙。」
執法數字偏低
警方發言人表示，元朗警區與分區警署一向關注區內違泊情況，警方會按實際情況檢控違泊車輛及司機。發言人又指出，根據紀錄，去年十一月至今年十一月，警方共接獲三宗涉及上述位置的汽車阻塞及違例泊車投訴，曾在附近一帶向違泊車輛發出二十六張告票。
「入去一次都唔只廿六架車違泊啦，係咪即係一年先抄一次牌？咁咪仲平過交租？」陳不滿警方執法數字偏低，無助改善違泊情況，希望警方能正視問題加強執法。