自貪曾上台，香港的政治文化無復以前嘅「斯文」，開始誘發連串掟嘢洩憤，引發傳媒焦點嘅拋擲運動，除了雞蛋，還有香蕉、溪錢、粟米斑塊飯等。
今次財爺陪特首落區做騷，被雞蛋擲中，引來不少話題，同文謂是「冥冥中似乎注定是黑狗得食，白狗當災」；依老朽推測，鬍鬚曾硬食雞蛋，根本是有意製造話題，果然佢懂得以幽默回答記者：「醫生叫我少食蛋，幸好今日沒有穿上名貴西裝！」這多少表現了做官的胸襟，所謂「宰相肚裏可撐船」是也；「捨不得錢，不能為義士；捨不得命，不能為忠臣。」捨不得被蛋黃蛋白濺吓件西裝，根本難以表達磊落有奇氣，鬍鬚曾今趟財政預算即使繼續做守財奴唔派錢，老朽都會原諒佢，一個胸襟廣闊嘅人，守財都係為大家將來好啫！
再講，鬍鬚曾係個運動狂，中西武術皆精，在美國讀書時更習詠春、南螳螂、洪拳等，一個自細與功夫結緣咁深嘅人，即使冇李小龍咁犀利，只要學到佢千分之一，避一隻雞蛋有幾難啫！老朽睇過一段巴西示威民眾一腳將警方擲出嘅催淚彈踢回去，相信係自細踢慣波，以鬍鬚曾自幼習武之經歷，相信連續擲十蛋都難擲中佢，佢唔以「摘葉飛花」回贈，表示佢「武德」有番咁上下，硬食雞蛋，體貼護主而已，其忠，不昭日月，也照溝渠啦！如果佢獲提名二○一七年普選特首，老朽一定重注瞓身押佢贏！
被示威者擲中，其實唔容易，唔好話雞蛋咁細，鞋咁大都唔易擲中，小布殊○八年訪問伊拉克，遭記者連擲兩隻鞋，唔中！溫家寶○九年出訪英國，在劍橋大學演講被當地學生掟鞋，唔中！馬英九據統計最少被掟鞋九次，又係冇次中！所以話鬍鬚曾一蛋一擲就中，此「一蛋定中原」之啟示乎？鬍鬚曾，香港靠你鐵肩負重任，強臂挽危局了！