「貪曾」前特首曾蔭權爵士同「貪湯」前任廉政專員湯顯明任內狼狽為「貪」，衝擊香港廉潔核心價值，打爛廉政公署金漆招牌。廉署用咗四十萬元研發咗個App近日面世，如果話同雙貪無關，真係好難令人相信囉。
個App裏面有廿一集短片，其中不日推出嘅一集係講廉署點處理涉及高官嘅貪污投訴，話由執行處首長級人員調查，如果懷疑有罪，就交畀律政司司長處理。雖然短片無指名道姓提貪曾，不過都不言而喻啦。廉署總新媒體宣傳創作主任關偉康就話，個App主要目的係令市民了解廉署工作，內容充實，不過就無舉報貪污功能，以免有洩漏舉報風險喎。
廉署喺連串醜聞下，士氣低落，尋日公布話頒嘉許狀畀七十幾位同事，表揚佢哋嘅工作，唔知o氹唔o氹得番啲同事呢？