政情：政改戰場 文采飛揚
政改諮詢正式展開，泛民、政府同中央三者嘅角力戰亦隨即開始，但過去一星期多，政壇普遍有個共通點，就係無論邊個陣營嘅人都出口成文，發言時總夾雜四字成語，先唔計《基本法》內列明均衡參與、循序漸進，連政府官員都變大文豪，不停話咩不言而喻、天經地義、呼之欲出，搞到政界充斥文化氣息。其實咁咪幾好囉，後生仔聽唔明都可以學好中文嘛。
呢股四字詞風氣，由基本法委員會主任李飛帶頭，話說佢早排來港，發表嘅演說就運用不少四字詞，除咗成日提到均衡參與、循序漸進，李飛亦提出唔少四字詞，例如機構提名、集體意志等，到底咩叫集體意志，咩叫機構提名，真係唔係個個知o架。李飛鍾意用成語，但對某啲四字詞就好敏感，好似「公民提名」就隻字不提。其實唔止四字成語，佢仲以「八九不離十」來形容某啲方案嘅內容。
CY林鄭 齊論愛國愛港
經常撰文嘅特首梁振英絕對係成語粉絲，除咗佢愛用嘅「方方面面」外，最近佢就形容特首愛國愛港係「天經地義」。不過講用字艱深，一定首推政務司司長林鄭月娥，同樣講愛港愛國，林鄭話呢個條件係理所當然同呼之欲出，諮詢文件無提及係不言而喻。嘩，差啲以為林鄭拍緊古裝片。林鄭咁好文采，同樣負責政改嘅政制及內地事務局局長譚志源就爭少少，只識話希望市民畀意見時「百花齊放」。
「九唔搭八」 駁「八九不離十」
呢股成語風氣仲席捲立法會，尋日立法會政制事務委員會，個個大文豪上身，公民黨郭家麒批評政改諮詢空間極細，同「劃地為牢」無乜分別。林鄭即時反擊，話諮詢要有方向，唔可以「天馬行空」。
面對李飛嘅「八九不離十」，民主黨劉慧卿就話有街坊向佢反映唔知講乜，回敬一句「九唔搭八」。工黨李卓人就玩轉政府宣傳口號，明明係有商有量、實現普選，阿人話係「無商無量、實現篩選」。講到出口成文，又點少得做過大學教授嘅黃毓民呢？尋日佢一口氣用三句成語「生安白造、捩橫折曲、斷章取義」批評政府，認真一絕。其實議員鍾意用四字成語，總好過用三個字啦。點解？心知肚明啦。