中環出更：陳振彬首獲博士銜
觀塘區議會主席陳振彬（Bunny）除咗公職瓣數多多，仲係製衣界巨頭，呢位跨國企業老闆尋日更獲香港公開大學頒發榮譽工商管理博士學位，係Bunny第一個榮譽博士名銜。Bunny大談成功之道，佢話當年遠赴泰國設廠，主動向員工分發公司三成利潤，實行有福同享，更創當地管理先河，難怪千幾個員工唔少已經跟咗Bunny十幾廿年啦。
Bunny首獲榮譽博士，但畢業袍亦遮唔住平日着開嘅冇領中山裝，現身撐場嘅陳太踢爆Bunny唔鍾意打呔又懶得襯衫，所以近年出席活動都係「仿中山裝」上陣。陳太笑言，屋企成個衣櫃都係呢款套裝，外套會根據四季天氣用唔同布料製造，咁就冬暖夏涼嘞。
黃偉綸李麗娟談「脫苦海」
新聞處處長黃偉綸同前民政事務局常秘李麗娟都嚟撐Bunny場，不過兩個人一度密斟，原來係李麗娟問黃偉綸幾時「脫苦海」，李麗娟話，「脫苦海」係政務官嘅「術語」，唔係話依家苦，而係調職咁解。聞說黃偉綸調任海事處處長，李麗娟就對佢好有信心，認為佢實做得掂嘅。
卓妮