中環出更：朱亦兵來港獻藝名人變粉絲
香江一向係臥虎藏龍之地，享譽國際嘅中國著名大提琴家朱亦兵早前嚟香港演出，吸引城中一班超級粉絲去追星，包括民政事務局副局長許曉暉（Florence）、大提琴名家張新玉、中國知名小提琴家李傳韻嘅父親李厚義等人。張新玉話，朱大師果然技驚四座。佢仲話，希望日後政府撥多啲資源支持藝術，可考慮邀請朱亦兵嚟香港開大師班，好過畀貪官亂使。
朱亦兵係中國室內音樂難得一見嘅大師，佢八歲習琴，廿歲在日內瓦國際大提琴比賽中大放異彩，成為中國大提琴界喺重大國際比賽中獲獎嘅第一人，旅居海外廿一年，享譽世界。佢十年前毅然回國，除咗間中跟隨國家領導人出訪或喺國事宴會上演出之外，多數時間係教授學生，提攜後輩。
許曉暉囡囡學大提琴
朱亦兵笑笑口話，雖然錢少，但好開心，皆因佢熱愛音樂，仲笑稱自己其實係做速遞，負責傳送快樂嘅訊息。
今次朱大師再次重返香江獻藝，Florence好興奮，事關佢雖然唔識拉大提琴，但勁鍾意大提琴樂聲，八歲嘅大女Serene已經學咗一年幾，遲啲細女Sophie都會學，到時佢喺屋企就可以聽到大提琴重奏喎！囡囡跟邊位老師學琴？正係張新玉。Florence話，佢好辛苦先搵到一位唔要求考試升級，又畀小朋友揀自己鍾意嘅歌嘅老師，坊間都鼓吹考英國皇家音樂學院升級試，因父母普遍要求小朋友喺小學畢業前考晒八級，以便報讀中學。佢唔想囡囡為升級或升學而學，所以揀老師都費盡心思。
卓妮