中環出更：晶晶極速修身 大晒定情物
已故全國政協副主席霍英東長孫啟剛同「跳水公主」郭晶晶嘅愛情結晶霎眼三個幾月大，啟剛同我哋講，話兒子已取名Lawrence。霍家上星期四為Lawrence擺百日宴，從啟剛提供畀我哋嘅圖片可見，一家三口為Lawrence一百日大切蛋糕慶祝，燭光中非常溫馨，Lawrence好安靜咁喺媽媽懷裏，唔知張相係唔係又係出自BB嘅嫲嫲、最美麗港姐朱玲玲嘅手呢？
晶晶產後話咁快修晒身，已經開始出席公開場合。日前出席由香港青年聯會、菁英會及華菁會齊合辦嘅聖誕Party，小纖腰再現。晶晶好有心思，特別揀選喺產後復出嘅場合，戴上定情信物，佢頸上閃爍嘅紅寶加鑽石頸鏈及耳垂上嘅耳環，原來係啟剛送贈嘅結婚禮物，認真大手筆。
啟剛話囝囝個樣老積
啟剛以青聯主席身份上台主持遊戲環節，晶晶就喺台下含情脈脈打氣，乖巧到極。難怪婚後嘅啟剛，開朗又鬼馬，笑言兒子樣子老積，似足「阿伯」，近日正在學習反身，樣子趣怪。啟剛又話兒子雙腿天生神力，遺傳媽咪嘅運動細胞。
雖然出身大富之家，啟剛為悉心栽培兒子，都一早儲定教育基金，買乜就保持神秘，但佢話總之一定唔會學媽咪朱玲玲咁，只買黃金。啟剛話：「啲金廿幾年來無乜點升過，早知叫媽咪買股票好過。」其實黃金喺過去三十年都升咗逾倍，可能啟剛想得到更進取嘅回報啦。啟剛又話嚟緊農曆新年，小啟剛會幫手出動逗利是，幫補吓爸爸支出，等佢唔使派得咁肉赤，真係識講笑。
卓妮