政情：樹根「鄧」唔出民政專員個名
身兼東區區議員嘅立法會議員鍾樹根近日殺入小西灣邨開設議員辦事處，尋日正式開幕，運輸及房屋局局長張炳良同食物及衞生局局長高永文都畀面出席，當然仲唔少得上星期一先上任嘅東區民政事務專員鄧如欣（Anne）啦！不過，樹根喺介紹嘉賓時就「鄧、鄧、鄧」咗好耐都講唔出Anne個名，最後只係稱呼「鄧專員」算數。連民政專員個名都唔知，睇嚟樹根終於跳出區議會層面喇。
議辦開幕 兩局長捧場
有局長現身，樹根就乘機表達訴求，向張炳良建議將港鐵線延至小西灣。張炳良就話，達致交通方便呢樣嘢「沒有最好、只有更好」，又話樹根成日問啲尖銳問題，如果仲祝佢會務蒸蒸日上，政府壓力會愈來愈多咁話。至於高永文亦不忘向樹根送高帽，話喺現場見到兩隻藍喜鵲，覺得嗰度人傑地靈喎。高永文接受訪問時因環境太嘈，於是做咗個代表「暫停」嘅手語，原來佢學咗幾個月手語，仲即場做咗個代表「愛」嘅手語送畀大家添。