政情：白鴿黨搵六「葬」士
二○一○年政改一役，民主黨（白鴿黨）最後關頭支持政府方案，被激進泛民主派發起「票債票償」運動，最終喺立法會選戰慘敗而回。今輪政改再次諮詢，該黨會否繼續「落疊」真係未知之數，但有熟悉該黨嘅政界中人分析，今次該黨唔係睇政府有咩終極方案，反而好大程度係視乎有幾多泛民議員願意擔當「葬」士，如果有六名泛民聯同該黨「陪葬」，相信會支持政改都唔出奇。
公文袋工黨勢投反對
上次政改，其實唔止白鴿黨入到西環談判，當年仲有職工盟李卓人（現為工黨）、公民黨湯家驊、民協馮檢基（阿基）等議員，但點知湯家驊同李卓人跳船離棄大隊，對政改投下反對票。最後得番阿基同白鴿黨投贊成票，結果令白鴿黨成眾矢之的，承受全部壓力。
據一位游走官商界嘅人士分析，從白鴿黨主席劉慧卿努力尋求共識嘅表現，認為該黨依然有意支持政改，幫香港人實現一人兩票。但前提係該黨唔想獨自孭起呢個擔子，盡可能搵多一兩個泛民大黨議員「落疊」，齊齊分擔壓力同政治後果。
不過，公民黨立場堅決，工黨又愈走愈遠，令白鴿黨只能向其他泛民議員埋手。該名官商界人士認為，湯家驊絕對係關鍵之中嘅關鍵，若最終出爐嘅政改方案「唔太難睇」，就算該黨反對，估計湯家驊亦好大機會第一個支持政改方案。如果係咁，分分鐘會發生「骨牌效應」，屆時與湯同一陣線嘅法律界代表郭榮鏗亦好大可能會支持政改。
溫和泛民取向成關鍵
不過，咁樣都唔足以令白鴿黨撐政改，該名官商界人士認為，除非多啲溫和泛民議員支持，例如會計界梁繼昌、資訊科技界莫乃光、衞生服務界李國麟同阿基。佢相信如果以上六人都願意支持政改，白鴿黨冇乜理由唔跟大隊喎。
今次政改有一弔詭之處，以上六個溫和泛民議員同白鴿黨六個議員，大家都唔敢行出第一步，只敢睇下對手點出牌。所以結論就係，今次政改能否通過，關鍵係有咩泛民願意行出第一步，嘗試同其他泛民溝通，否則無論方案係點，通過機會都係等於零。