政情：林慧思自稱要睇精神科
小學教師林慧思早前爆粗辱警引起軒然大波，事隔近五個月，林慧思尋日又再接受電台訪問，透露心情平復咗好多，但原來一直仲請緊假未復課，計落已經三個幾月冇開工喎。佢仲自稱有焦慮、抑鬱甚至創傷後遺症，家庭醫生擔心佢情況惡化，決定將佢轉介去睇精神科醫生。
爆粗辱警 復課無期
咁到底幾時先可以復課呢？已經抖咗三個幾月嘅林慧思自覺準備就緒重返崗位，但醫生認為佢未係時候，校方亦勸佢休息夠先再決定喎。至於佢自稱事發當日由上水「行經」旺角買餸，一直被指係煙幕兼自設嘅「局」，林慧思解釋，自細喺旺角長大，所以特別鍾情去旺角買餸，事發當日正正行緊去街市買餸，只係因為掛住鬧警察，搞到餸都冇時間買喇。
嗰次事件引發嘅千人集會查實源於中港矛盾，作為本土派中堅分子嘅林慧思，就建議與其任由內地人湧入香港搞「中港融合」，不如呼籲港人搬返內地，同內地融合仲好喎。講就容易，點解林慧思唔考慮率先北上定居、同內地融合吓呢？話唔定可以化解中港矛盾呢。