政情：中環出更：「普選」珠寶小姐
香港政改諮詢開波，相信做主打嘅政制及內地事務局局長譚志源（Raymond）有排忙。早前佢趁諮詢未啟動前難得清閒，出席香港珠寶製造業廠商會廿五周年晚宴，當晚現場賓客可以同評審齊齊票選新一屆珠寶小姐。Raymond趁機搞爛Gag推銷政改話，雖然未到二○一七年一人一票選特首，但當晚大家已可行使投票權，嘗到普選嘅滋味喎！
當晚珠寶界人士雲集，包括中華廠商聯合會副會長吳宏斌（Dennis）及囝囝吳景瀚，仲有古珀行珠寶總裁沈運龍（Aaron）及太太Alice。Dennis喺業界人面甚廣，唔只出面請Raymond去做主禮嘉賓，亦有唔少台灣及內地行家去捧場，新任主席劉家健都話要跟佢學嘢。
心水跑出 大輝風騷
當晚評審有前港姐鄺美雲、前亞姐陳煒、時裝設計師何國鉦及立法會議員林大輝等人。大輝一入場就胸有成竹話，當晚候選佳麗個個都咁靚，好多人話唔知揀邊個，但佢做過香港小姐評判，一早睇好二號，結果二號真係以大熱勝出，抵佢咁風騷。
「朱古力公主」王淑筠亦有到場，但當晚佢身體抱恙，由於佢家族做珠寶生意，所以幾攰都要去撐場。擁有自家品牌嘅珠寶設計師鄭陳曼芝就透露，正與「假髮大王」趙振國、香港鐘表業總會前主席黃業光等人發起成立香港品牌總商會，預計明年三月成立。
卓妮