勇司機螳臂當巴險夾扁
【本報訊】內地有為救廿四名乘客而送命的神勇司機吳斌，香港亦有旅巴「超人」。昨日一段巴士司機「發神功」圖推停狂飆旅巴的片段引發熱議。事緣深圳灣口岸港方管制區內一輛旅巴，「無人駕駛」衝入候車區，乘客四散逃命，但剛下車的司機竟亡命擋巴士，更試圖迎面推停大巴，險變「人肉三文治」，雖然「推停」奇迹無發生，但無傷及乘客。有人說他夠傻，亦有人讚他夠勇。負傷的南哥昨解開「壯舉」之謎，他稱電光火石間只是怕殃及途人，出於本能反應才「想整停佢」。
疑忘拉手掣 跨境大巴溜前
事發於深圳灣口岸（港方口岸區）的三十號上客區。短片顯示，一輛五十四座跨境旅遊巴士突然溜前剷入候車區，五名乘客大驚四散。此時，神奇場面發生，只見一名打扮似司機的男子，正背離巴士走向公廁，他聞騷動聲回望，並急步衝向大巴左車頭，欲打開車門登車，惟大巴愈衝愈快，原以為他放棄，詎料不可思議的情況發生了，他竟走到車頭前，伸出雙臂以一人之力與巴士鬥力，好似要推停大巴，但反被巴士推後兩米，旅巴續衝前五米，將他撞跌在車輪旁，復撞毀扶手梯後停下，玻璃碎片四濺，不少網民都驚呼「咁都得？」
本報記者追查下，找到片中男主角南哥（五十歲）。原來他是肇事旅巴的司機，與妻子及兩女一子一家五口居於荃灣石梨邨。南哥憶述，前晚八時許在上客區泊車後，便落車步往洗手間，惟下車幾秒，便發現車身前溜。「都唔知係唔係手掣壞咗？」，問他當時是否以為有「神力」推停巴士，他稱：「當時咩都無諗」，只覺得是職業司機的自然反應，「擰轉面就見到架車識郁，下意識就想整停佢，好驚會撞到人！」他大難不死，手骨及肌肉扭傷，雙膝受輕傷。
事後先識驚 唔敢告知妻兒
南哥稱，揸旅巴廿年從未發生類似意外，「發生啲咁嘅事個心都好唔安樂，不過真係好好彩，無人受傷，車爛唔緊要，最緊要人無事。」「事後先識驚，依家都唔敢同老婆仔女講。」有目擊經過的旅巴司機稱，認識南哥多年，認為他經驗豐富，一向穩陣。事發時，聽到有人大叫「小心呀！」，南哥的行為非常危險，幸當時旅巴的車尾輪被指示牌的石壆卡住，有同行上車將車煞停，否則一定會將他輾過。
警方表示，前晚八時半接獲市民報案，指一輛旅遊巴士在深圳灣港方口岸，溜前撞向一條自動電梯。姓黃（五十歲）男司機腳部被玻璃割傷，其後被送院治理。