政情：公民講場：阿毛炒冷飯 議員遲收「工」

政府官員已經先後多次為免費電視發牌解畫，但偏偏公民黨毛孟靜（阿毛）就接力「炒冷飯」，前晚喺立法會動議引用《立法會（權力及特權）條例》傳召港視主席王維基及通訊事務管理局主席何沛謙，由於類似動議辯論已經係第四次，都唔知仲有乜嘢好講。不過，由於前晚好多建制派議員喺晚上十點左右已經鬆人，為免令泛民主派趁建制派議員人少而玩突襲表決通過動議，工聯會黃國健等議員要捱義氣坐定定睇檔兼「拉布」，拖到臨近凌晨十二點仲要求響鐘「點人數」，目的係博流會等尋日續會多啲建制派議員時再討論，佢哋真係多得阿毛唔少！