政情：「好市民」四十周年 獎金加碼
每年警方都會向一啲見義勇為嘅市民頒發好市民獎，但唔係好多人知道，原來呢個獎一直由香港總商會贊助，而且早喺一九七三年開始頒發。今年踏入四十周年，總商會計劃大搞慶祝，包括搵番七三年首次獲獎嘅一名六歲小朋友出來講吓獲獎感受。不過事隔四十年，呢位現年四十六歲嘅好市民，隨時已經移咗民，負責甄選得獎者嘅警察公共關係科亦早已同佢失去聯絡。
袁莎妮唔知設獎由來
好市民獎四十周年慶祝儀式，將於本月十九日舉行。總商會行政總裁袁莎妮話，佢哋翻箱倒櫃，都搵唔番當年點解會搞呢個獎，亦唔知點解會由總商會贊助，估計係當年香港治安麻麻，促成警方同當年嘅總商會高層合作搞番個好市民獎，表揚吓啲見義勇為、主動協助警方除暴安良嘅市民。雖然最後都搵唔番七三年嗰位好市民，但就搵到三位多年前嘅得獎者，向佢哋再頒發多個「別具意義獎」。
好市民獎每年約有四十名得獎者，其中一人會獲頒發大獎，過往獎金分別為二千元及三千元。為咗慶祝四十歲生日，今年起普通獎同大獎嘅獎金，將分別加碼至三千元及四千元，金額唔算好高，但勝在有意義。