政情：政改諮詢啟動 謝偉俊冇赴會
政府前日正式啟動政改諮詢，政務司司長林鄭月娥親自領軍到立法會宣讀政改諮詢文件，但唔係每個議員都會坐定定聽佢講嘢，好似行蹤飄忽嘅謝偉俊（Paul）就全程冇現身，直至夜晚九點先趕返立法會開會。因乜原因咁大膽連政改都唔聽？原來阿Paul係為咗飛去美國同母親大人慶祝八十大壽。
赴美賀母親八十大壽
其實阿Paul八十年代尾曾經舉家移居美國，之後回流香港發展，但佢所有屋企人就留喺美國，所以久唔久都會飛返美國探親。咁啱近日係佢母親八十歲大壽，為做孝順仔，點都要飛返美國新澤西州賀壽，亦順便同定居美國嘅屋企人團聚，提早過溫馨聖誕節。阿Paul話，今次赴美亦特登去爸爸墓地拜祭，而且今次行程計劃咗好耐，唔係專登避開政改，叫大家唔使咁多猜測喎。