中環出更︰入元朗冧鄉紳 林鄭一舉三得？
鄉議局主席劉皇發前日喺立法會大會提出反對將西貢大浪西灣納入郊野公園嘅修訂動議時，發言批政府拳拳到肉，但動議最後都被否決，一班受影響嘅鄉紳有幾火滾、同政府關係有幾差，大家心裏有數喇。不過，卓妮收到風，政務司司長林鄭月娥尋日千里迢迢入元朗，出席鄉議局元朗區中學畢業禮，咁畀面發叔，據聞唔只想為大浪西灣單嘢補鑊同推銷政改咁簡單。
出席鄉局中學畢業禮
林鄭尋日早上十點半鐘就乘坐其司長座駕到達鄉議局元朗區中學，出席該校畢業兼頒獎禮。直至中午時分，林鄭隨該校校董會主席發叔、校董八鄉鄉委會主席曾憲強、十八鄉鄉委會主席梁福元及校長同教師，到地下禮堂食盆菜，直至下午一點幾鐘先至離開，足足逗留咗近三個鐘，認真畀面。
據聞林鄭喺畢業禮上除咗勉勵畢業生外，仲趁機推銷政改諮詢內容。不過，聞說政制及內地事務局局長譚志源（Raymond）都係呢間中學嘅校友，但點解校方唔請Raymond主禮，反而要請林鄭呢？林鄭前日一改過去斬釘截鐵話唔選特首嘅口脗，今次佢入元朗冧掂班鄉紳，莫非為將來參選特首鋪路？
講開又講，鄉議局尋日傍晚見特首梁振英，表達對施政報告嘅意見，但發叔以開立法會為由，改派副主席張學明帶隊。立會喺特首辦隔籬啫，真係行開一陣都唔得？定係唔想見特首呢？
卓妮