中環出更：導賞立會梁君彥催眠細路
立法會尋日起一連八個星期舉辦「從立法局到立法會」活動，展出立法局一系列陳年文物，包括前主席座椅、大銅鑼、法例文本等，慶祝立法機關成立一百七十周年。主席曾鈺成、內務委員會主席梁君彥（Andrew）除咗出席開幕禮外，亦有幫手帶導賞團，向參觀嘅小朋友介紹立法會歷史及設施。不過，Andrew全程以一貫平板呆滯嘅聲線催眠小朋友，個個冇嚟反應，難怪佢自嘲係低級導賞員。
聲線呆滯 無人睬佢
為咗喺帶團時打破悶場，Andrew先問最近佢嘅小朋友想唔想做立法會主席，但眼見對方一啲反應都無，佢惟有改問其他小朋友想唔想做長毛（梁國雄），但都係無人睬佢，搞到佢要將個波交番畀真正嘅導賞員姐姐。被問到曾鈺成帶團帶得好過佢時，Andrew就爆出一句：「梗係啦，我比主席低幾級」，又自嘲係「低級導賞員」。
九一年當選議員至今嘅劉慧卿，係少數同時經歷立法局及立法會嘅議員。卿姐話，立法局年代好多委任議員，會議廳座位同發言次序都要論資排輩，所有會議仲要閉門進行，幾經爭取後先至可以廢除呢啲不平等規定。多年來女議員比率都嚴重偏低，但卿姐話唔少男議員都好有紳士風度，有時仲覺得啲女議員講嘢仲大聲過啲男議員。
九五年參加立法局選舉落敗、無緣見證立法局年代嘅曾鈺成就話，雖然當年失落議席，但贏得街坊嘅心，即使佢後來離開九龍中選區，唔少街坊仍跨區搵佢處理地區事務。
卓妮