政府尋日展開政改諮詢工作，掀起政界人士討論，發現有報章頭版全版廣告寫住「你有得揀」四隻大字，為廣告內容議論紛紛，點睇都解唔通呢四字真言。有人就猜測廣告內容係咪同下屆特首選舉「你有得揀」有關。
香港寬頻發言人話，現時寬頻市場幾乎所有網絡商都規定用戶要簽兩至三年「死約」，中途一旦斷約就要畀「掟煲費」，市民根本無得揀。所以該公司就推出一款「生約」，用戶就算隨時終止合約都唔使畀罰款，澄清有關廣告同政治拉唔上任何關係喎。
講開又講，「魔童」王維基為發展免費電視，去年忍痛出售「親生仔」香港寬頻予CVC Capital Partners，香港寬頻現由楊主光擔任行政總裁。仔就賣咗，但王維基就申請唔到免費電視牌照。