政情：林伯黃鴨「重生」 工展義賣
今年大熱嘅玩具必數黃色巨鴨，但講起黃鴨，原來早於一九四八年已經興起，當年靠生產經典黃鴨玩具起家、行政會議成員林健鋒父親林亮（林伯），近年決定讓已停產五十年嘅黃鴨「翻生」。早前佢搵玩具設計師幫佢個「乖仔」黃鴨改頭換面，鴨眼睛改成水汪汪，鴨嘴角更彎更翹，頭上更加番三條頭髮，寓意有赤子之心，下周六就會擔任工展會吉祥物，勢再掀起熱潮。
善款扣成本後作獎學金
新設計嘅黃鴨將命名為「Lamon Tea」，係林伯個英文名同檸檬茶英文「Lemon Tea」嘅混合體，會連同黃鴨錢箱、杯蓋等十萬件產品，喺工展會作慈善義賣，扣成本後會作為廠商會兩間中學嘅獎學金。林伯太太更為慈善不遺餘力，早前出席「玩具大王」蔡志明娶新抱飲宴時，拎咗五隻黃鴨畀海洋公園主席盛智文同演藝界人士簽名，而早前去北京時更請埋內地女星斯琴高娃簽，認真夠面子。
今年工展會將會喺本月十四日至明年一月六日喺維多利亞公園舉行，入場費十元，場內有逾四百家參展商，逾廿種產品以一元優惠價限量發售。雖然廠商會唔肯估計今年入場人次，但就話總銷售額會比去年七億港元多五至十個百分點。