每逢香港政壇有重大事情發生，「搞事四人幫」之一嘅「民主阿婆」前政務司司長陳方安生都不甘寂寞蒲頭抽水。政府尋日展開政改諮詢，民主阿婆當然第一時間撲出嚟啦！話說佢尋日以名譽贊助人身份出席「香港啟迪會」成立十周年慈善晚宴嘅簡介會，忽然變身做咗時事評論員，一時話政府諮詢得五個月唔足夠，一時又話首份諮詢文件冇實際建議，要之後嘅諮詢先有用，究竟佢係咪前後矛盾呢？
民主阿婆早已冇晒政治能量，點知政府尋日一宣布展開政改諮詢，佢就「騎劫」人哋個活動噏番幾句政改。佢話五個月政改諮詢唔足夠，因為二○一六年立法會選舉法例修訂，最遲要一年前，即係二○一五年七月就要完成，畀有意參選嘅人知道規則喎，但依家就嚟到一四年，五部曲都仲未啟動，又話陰謀論話政府特登拖到咁晏諮詢，最後就話「你接唔接受吖，唔接受就原地踏步」。可能民主阿婆做官嗰陣慣咗慢手慢腳，你唔畀新政府效率會快啲咩！
民主阿婆除咗出嚟噏嘢，佢有份成立嘅「香港2020」組織仲做咗鍵盤戰士，（目及）實社交網站，當政府個政改諮詢專頁出台，就重複兩次留言佢哋嘅立場書，其實發言唔係計量，而係計質素，濫竽充數係無用嘅，明唔明？