政情：錯鑫無能 消防閉門失火
醜聞不絕嘅消防處真係亂事一籮籮，除咗調派系統頻頻故障外，消防車又成日撞車，正副處長又亂過馬路、僭建鐵閘，最弊係收到投訴應查唔查，更被審計署報告批評該處處理投訴同執法有多項失職。消防處高層領導無方，亦引致內部立立亂，最近消防處職工總會爆內訌，新一屆理事會上任唔夠半年，繼主席李德其早前辭任後，另外四位理事因為不滿工會有人太「保皇」，都辭任埋工會職務。
消防處繼早前硬推救護車「天眼」計劃，因而辣慶救護員工會後，近日連成立超過半世紀嘅消防處職工總會亦因為高層同工會「接觸」問題而爆內訌。有消息話，今次消防工會內訌嘅導火線，喺早前有工會中人同其他紀律部隊工會傾偈嗰陣，提到想空降AO（政務官）做消防處處長，有消防高層聽到之後擔心自己將來無得做「一哥」，於是緊急召見工會問個究竟，睇吓呢個消息從何而來，可信性有幾真。
傳有理事違規 私自搵高層
有消息透露，一名「保皇派」工會理事喺未經工會投票決定下，就私自「面聖」向消防高層澄清無空降處長嘅傳聞，因而就令四位理事好嬲，批評此舉打破工會多年規矩，加上一直不滿班「保皇派」理事對高層太馴服，覺得理事會已經做唔到監察管理層及為同袍爭取福利嘅作用，所以齊齊「劈炮」唔做工會。其實班消防高層無理由唔知工會嘅規矩，如今搞到工會內訌不和，管理能力同政治危機意識確實係低。
消息又話，其他紀律部隊工會同公務員事務局就增加退休公屋配額嘅問題拗緊數，而消防處職工總會有成五千個會員，有一定影響力，擔心工會偏向「保皇」，萬一佢哋有唔同意見嘅話，就好難再同政府談判喇。消防處內外問題不絕，工會內訌正因為上樑不正下樑「亂」，作為處長嘅陳楚鑫真係要認真正視問題，咪淨係識擔住口煙亂過馬路，否則能否完成任期都好難擔保呀！