中環出更：泰局勢緩和 議員後知後覺
泰國近日就抗議總理英祿示威連連，上周仲發生槍擊事件。但事件峰迴路轉，今日泰王生日變成契機，令事件暫時降溫。不過，立法會議員陳鑑林（橄欖）尋日喺大會提出「急切」口頭質詢，話曼谷局勢或會逐步惡化，問政府會否將外遊警示由紅色提升到黑色，有議員仲插政府後知後覺添。保安局局長黎棟國話，全世界只得香港同台灣發出呢個水平嘅警示，似乎後知後覺嘅係啲議員喎。
質疑當局唔發黑色旅警
議員王國興就話，市民質疑政府同旅行社以及航空公司「官商勾結」，所以一直唔發黑色警示，「係咪冇香港人死就唔發？」連旅遊界姚思榮都質疑發警示係後知後覺。
黎棟國好有耐性回應，話示威者集結地方係政府辦公大樓，一般旅遊區唔受影響。截至尋日為止，仲有廿三個香港旅行團，約四百六十一人喺曼谷、芭堤雅或華欣。由星期一提升警示至紅色，入境處已經向四百二十三名登記咗「外遊提示登記服務」、正身處泰國或準備前往泰國嘅市民發放最新資訊。中國駐泰國大使館收到一個港人求助個案，政府亦會在有需要時預留機位甚至包機畀港人。
卓妮